سوریش رینا د ۱۳ م پړاو هند غوره لیګ سیالیو سره بایکاټ اعلان کړ
ولید ( خپلواک )
هندي سوریش رینا چې د هندوستان په سوداګریز یا آی پي ایل لیګ کې د چینایي سوپر کینګز د لوبډلې مخکښ لوبغاړی ، پرون ماښام یې د نامعلوم دلیل له مخې د ۲۰۲۰ م کال دیارلسم پړا آی پي ایل سیالیو سره بایکاټ اعلان کړ.
سوریش پرون د متحد عربي اماراتو څخه بیرته هندوستان ته راستون شو.
د رینا بیرته راتګ چینایي لوبډلې ته یو بل سخت ګوزار و، تېره ورځ یې د لسو لوبغاړو څخه د کرونا ټیسټ اخیستی و چې یو لوبغاړی یې په کرونا ککړ و. سوریش رینا چې د چینایي سوپرکینګز لوبډلې یو له مهمو لوبغاړو څخه دی، نوموړي په ۲۰۰۸ زیږدیز کال د هند په سوداګریز لیګ کې ګډون وکړ چې تراوسه یې ۱۶۵ سیالۍ ترسره کړي دي.
د کرکټ مشهورې نړیوالې ویب پاڼې په خپل راپور کې لیکلي، چې سوریش رینا د کورنیو ستونزو او شخصي مسایلو له امله بیرته د متحد عربي اماراتو څخه هند ته راستون شوی.
خو هندي مینوال او د چینایي سوپرکینګز ځنې غړي بیا دا خبره تر ډېره سمه نه بولي.
سوریش رینا چې څه موده وړاندې یې د ایم ایس ډوهني څخه وروسته د نړیوال کرکټ سره مخه ښه وکړه د ډېرو مینوالو لپاره خورا زړه بدونکی خبر و. لا تر اوسه پورې چينایي لوبډلې د نوموړي د بیرته راتګ په اړه څه نه دي ويلي.
یاده دې وي چې د هندوستان هیواد سوداګریز یا آی پي ایل لیګ د راتلونکې سيپټمبر میاشتې په ۱۹ نېټه د هند پر ځاې په متحد عربي اماراتو کې پيلیږي، چې ګډون والې لوبډلې څو ورځې وړاندې متحد عربي اماراتو ته رسیدلی دي.
