نن/شنبه ولایتي چلنج جام: هلمند، کابل لوبډله او خوست بیا بلخ لوبډله ماته کړه
د ولایتي چلنج جام سیالیو په لړ کې نن شنبه چې د زمري میاشتې له ۲۵مې نېټې سره سمون خوري، هلمند په ۶ ویکټو کابل ته ماته ورکړه.
هلمند لوبډلې د کابل د ۱۲۵ منډو هدف د لوبې په ۲۸م اور کې د ۴ لوبغاړو په سوځېدو سره ترلاسه کړی، ددې لوبډلې لپاره قدرت الله کاکړ ۴۴ ناسوځېدلي منډې او رحیم الله سهاک ۳۴ منډې جوړي کړې، د کابل په ګټه شفیق الله غفاري ۲ لوبغاړي وسوځول.
د کابل لوبډلې لپاره بیا دورېش رسولي ۴۱ منډې ترلاسه کړي وې خو د هلمند تېز توپ اچوونکي دستګیرخان ۳ لوبغاړي سوځولي وه.
بل پلو بیا:
د ولایتي چلنج جام لوبو دوهمه سیالۍ کې خوست په ۶ ویکټو بلخ ته ماته ورکړه.
بلخ لوبډلې د ۱۴۵ منډو هدف ټاکلی و چې عبدالرازق ۴۵ منډې ترلاسه کړي وې او ضیاالرحمن شریفي ۵ لوبغاړي سوځولي وه.
د بلخ ټاکل شوی هدف خوست د لوبې ۳۱م اور کې د ۴ لوبغاړو په سوځېدلو ترلاسه کړی، د خوست لپاره رحیم منګل ۳۸ منډې او محمدالله ۲۸ منډې جوړي کړې.
