تاند (دوشنبه، د وږي/ سنبلې ۹ مه) لیکوال او د افغانستان یو پخوانی تجربهکارو خبریال، ډاکتر محمد امین واکمن، د امریکا په ویرجینیا ایالت کې د ۸۶ کلونو په عمر وفات شو.
د نوموړي مېرمن پروین واکمن امریکا غږ ته ویلي چې محمد امین واکمن د پښتورګو د ناروغۍ له امله د اګست پر ۲۹مه، د شنبې په شپه، په خپل کور کې ساه ورکړه.
ډاکتر واکمن یوه موده د افغان ملت ګوند مشر و.
واکمن په ۱۹۸۸ کال کې د امریکا غږ له پښتو څانګې سره دنده پیل کړې وه او شاوخوا دوې لسیزې یې له دې رسنۍ سره د ژونالیست او ویاند په توګه کار کړی و.
هغه د پښتو ژبې، تاریخ، ادب او ټولنیزو مسلو په اړه ګڼې لیکنې او د سوشل ډېموکراسۍ په اړه یې یو کتاب هم لیکلی دی.
نوموړي په ۱۹۶۴ کال کې د کابل پوهنتون د ژورنالېزم له پوهنځي څخه د لیسانس سند ترلاسه کړی و. هغه د ټولنیزو علومو او فلسفې په برخو کې دوې ماسټرۍ هم درلودې.
واکمن د هند له جواهر لعل نهرو پوهنتون څخه په سیاسي علومو کې د دوکتورا سند هم ترلاسه کړی و.
د واکمن د کورنۍ په وینا، ټاکل شوې چې د هغه جنازه د سېشنبې په ورځ، د سپټمبر په لومړۍ نېټه، د امریکا په ویرجینیا ایالت کې خاورو ته وسپارل شي.