تاند (دوشنبه، د وږي/ سنبلې ۹ مه) د ترانسپورټ وزارت د هوا پېژندنې ریاست د نن (دوشنبې، د وږي ۹مې) لپاره د افغانستان په ځینو برخو کې د سختو بارانونو او ناڅاپي سېلونو د راوتلو خبرداری ورکړی دی.
د افغانستان د هوا پېژندنې ریاست په وینا، په نورستان، کونړ، لغمان، ننګرهار او خوست ولایتونو کې له ۱۰ تر ۳۰ مليمتره پورې د باران اټکل شوی دی.
دا هغه ولایتونه دي چې په وروستیو کې د سختو ورښتونو او سېلونو له کبله پکې د سرومال ډېر تاوانونه پېښ شوي دي.
دغه ریاست ویلي چې د افغانستان په شمالي، لوېدیځو، جنوبي، جنوبختیځو، ختیځو او مرکزي سیمو کې د سختو بادونو او دوړو اټکل کوي چې سرعت یې ښايي په ساعت کې له ۵۰ تر ۹۰ کیلومترو پورې ورسېږي.
د هوا پېژندنې ادارې په زیانګالو سیمو کې د ناڅاپي سېلونو د راوتلو په اړه هم خبرداری ورکړی دی.
دا خبرداری په داسې مهال ورکول کېږي چې په وروستیو اوونیو کې سختو بارانونو او سېلونو د افغانستان په یو شمېر ولایتونو کې د سر و مال زیانونه اړولي دي.