تاند (پنجشنبه، د زمري/ اسد لومړۍ) د فوټبال د ۲۰۲۶ نړیوال جام په پایلوبه کې له هسپانیا څخه په اضافي وخت کې له ماتې وروسته، د ارجنټاین ملي لوبډله خپل هېواد ته ستنه شوه او مینهوالو یې تود هرکلی وکړ.
د نړیوالو رسنیو د راپورونو له مخې، د لوبډلې د هرکلي لپاره په هوايي ډګر کې سره غالۍ غوړول شوې وه، پوځي بانډ ډورته وغږول شو او زرګونه مینهوال د ارجنټاین د فوټبال فدراسیون د دفتر مخې ته راټول شوي وو. خو د ارجنټاین لوبډلمشر لیونل میسي له لوبډلې سره یوځای هېواد ته نه و ستون شوی.
راپورونه وایي چې د ارجنټاین فوټبال فدراسیون مخکې اعلان کړی و چې د میسي په ګډون، یو شمېر لوبغاړي، به له رسمي پلاوي سره سفر ونه کړي.
د راپورونو له مخې، میسي د خپل کلب انټر میامي نوي فصل ته د چمتووالي او همداراز د فزیکي او ذهني بیا رغونې لپاره په امریکا کې پاتې شوی و، ځکه د کلب لومړۍ لوبه د جولای په ۲۳مه نېټه ټاکل شوې ده.
وروسته بیا میسي په یوه شخصي الوتکه کې ارجنټاین ته ورسېد.
ویل کېږي چې میسي به د جولای په وروستیو یا د اګست په پیل کې بېرته له انټر میامي سره یوځای شي، څو د امریکا د میجر لیګ ساکر (MLS) د روان فصل په سیالیو کې برخه واخلي.
د رسنیو د راپورونو له مخې، د ارجنټاین ملي لوبډله تر سختو امنیتي تدابیرو لاندې په بسونو کې د لیونل اندریس میسي روزنیز مرکز ته ولېږدول شوه. د لارې په اوږدو کې زرګونو مینهوالو د ملي بیرغونو، ډولونو او شعارونو په بدرګه د لوبغاړو هرکلی وکړ او د نړیوال جام په سیالیو کې یې د لوبډلې د غوره فعالیت له امله مننه ترې وکړه.