تاند (سې شنبه د چنګاښ/سرطان ۳۰مه) د پاکستان د جمعیت علمای اسلام مشر مولانا فضل الرحمن د پاکستان پر حکومت نیوکه کړې چې، امریکا ته یې پر افغانستان د یرغل زمینه برابره کړې وه.
هغه ویلي چې، امریکایي الوتکو به د پاکستان له فضا په تېرېدو پر افغانستان بریدونه کول.
مولانا فضل الرحمن زیاته کړې چې پاکستان افغانستان ته د هېڅ وسلهوال د تګ مخه نه ده نیولې.
نوموړي د خپلو خبرو په یوه بله برخه کې، د پاکستان د حکومت له لوري د دیني مدرسو د نه ثبتولو په غبرګون کې ویلي چې، دغه حکومت په یوه ډول د مدرسو زدهکوونکي هڅوي چې لاریون وکړي او وسلو ته لاس کړي، څو بیا یې پوځ ته د وسلو پر مټ د مهارولو زمینه برابره شي.
د مولانا فضل الرحمن وروستۍ څرګندونې یو ځل بیا د افغانستان د جګړې پر مهال د پاکستان د رول په اړه هغه زاړه بحثونه راژوندي کوي چې کلونه پرې سیاسي او ډیپلوماټیک اختلافات موجود وو.
سیاسي شنونکي وایي، که څه هم نوموړي دا څرګندونې د پاکستان د کورنیو سیاسي اختلافاتو په ترڅ کې کړې دي، خو دا خبرې ښيي چې د افغانستان د جګړې او د ترهګرۍ پر وړاندې د مبارزې په نوم د پاکستان د تګلارو په اړه لا هم په خپله پاکستان کې بېلابېل او متضاد دریځونه شته.
دا ډول اعترافونه د سیمې د امنیتي سیاستونو او د افغانستان د څو لسیزو کړکېچ د عواملو په اړه د نوو بحثونو زمینه هم برابروي.
شنونکی وړاندیز کوي چې، د سیمې د تلپاتې ثبات لپاره اړینه ده چې ټول هېوادونه د یو بل پر وړاندې د نیابتي سیاستونو پر ځای د متقابل باور، نه لاسوهنې او رښتینې سیمهییزې همکارۍ ته لومړیتوب ورکړي، ځکه د دوی په باور یوازې همدا لاره دوامدار امنیت او سولې تضمینولای شي.