تاند (یکشنبه، د چنګاښ/ سرطان ۲۸ مه) د افغانستان امنیتي ځواکونو د نیمروز په دښتو کې د هغو پنځو افغانانو جسدونه موندلي، چې ایران ته په غیرقانوني لارو د تګ پر مهال د سختې تندې او ګرمۍ له امله مړه شوي وو.
د سیمهییزو رسنیو د راپورونو له مخې، امنیتي ځواکونه د هغو ۱۴ نورو کسانو د موندلو هڅې هم کوي چې لا هم ورک دي.
د نیمروز د پولیسو ویاند ګل محمد قدرت ویلي، موندل شوي پنځه مړي د یوې ۱۹ کسیزې ډلې غړي وو، چې غوښتل یې د هلمند او نیمروز د لیرې پرتو دښتو له لارې په ناقانونه توګه ایران ته واوړي.
هر کال ګڼ شمېر افغانان، په ځانګړې توګه ځوانان، د کار او ښه ژوند د موندلو په هیله په غیرقانوني لارو ایران ته د تګ هڅه کوي.
تېر کال هم لسګونه افغان کډوال ایران ته د اوښتو پر مهال د سختې یخنۍ له امله مړه شوي وو.
همداراز لسګونه نور د ایراني پوله ساتو له لوري وژل شوي دي.په افغانستان کې د کار نشتوالی او اقتصادي تنګسه سبب کېږي چې افغانان د مرګ خطر په غاړه واخلي او نورو هیوادونو ته د تګ هڅه وکړي.