تاند (شنبه د چنګاښ/سرطان ۲۷مه) د ملګرو ملتونو پراختیایي پروګرام (UNDP) ویلي، په افغانستان کې د ښځو په نوم د سوداګریزو جوازونو شمېر د تېرو پنځو کلونو په پرتله لس برابره ډېر شوی او دا مهال له لس زرو ډېرې ښځې رسمي سوداګریز جوازونه لري.
د یونډيپي په په خبرپاڼه کې راغلي چې د افغانستان د سوداګرۍ او پانګونې خونې د شمېرو له مخې، پر دې سربېره شاوخوا ۱۲۰ زره نورې ښځې هم له رسمي جواز پرته سوداګریز فعالیتونه کوي.
یونډيپي ویلي، سره له دې چې د ښځو پر زدهکړو او کار محدودیتونه دوام لري، کوچنۍ سوداګرۍ د افغان ښځو لپاره د عاید تر ټولو مهمه سرچینه ګرځېدلې ده.
د خبرپاڼې له مخې، یونډيپي له ۲۰۲۱ کال راهیسې له ۹۰ زرو څخه د ډېرو کوچنیو، منځنیو او وړو سوداګریزو بنسټونو ملاتړ کړی او د مرستو، تجهیزاتو او سوداګریزو خدمتونو له لارې یې د ښځو د اقتصادي ګډون د پیاوړتیا هڅه کړې ده.
یادې ادارې همداراز ټینګار کړی چې د اسلامي مالي خدمتونو، ډیجیټلي تادیاتو او د ښځینه متشبثینو لپاره د ځانګړو مالي اسانتیاوو پراختیا به د افغان ښځو د اقتصادي پیاوړتیا لپاره خپلو هڅو ته دوام ورکړي.
د ښځو په نوم د سوداګریزو جوازونو زیاتوالی ښيي چې افغان ښځې، سره له شته محدودیتونو، د اقتصادي خپلواکۍ او د کورنیو د عاید د لوړولو لپاره سوداګرۍ ته مخه کړې ده.
که د طالبانو د حکومت محدودیتونه راکم او د مالي اسانتیاوو، بازار موندنې او مسلکي روزنې ملاتړ لا زیات شي، د ښځو اقتصادي ونډه به نوره هم پیاوړې او د هېواد په اقتصادي وده کې به اغېزمن رول ولوبوي.