تاند (شنبه، د چنګاښ/ سرطان ۲۷ مه) د ارجنټاین او هسپانیا ترمنځ تر پایلوبې یوه ورځ مخکې نن (شنبې) د فرانسې او انګلیستان لوبډلې د درېیم مقام لپاره سیالي کوي.
د فرانسې ملي لوبډله هڅه کوي چې له هسپانیا څخه د نیمهپایلوبې تر ماتې وروسته بېرته ځان راټول کړي او د ۲۰۲۶ کال د فیفا نړیوال جام د درېیم مقام په ګټلو سره ټورنمنټ په بري پای ته ورسوي.
بل لور ته، انګلستان هم غواړي چې پر ارجنټاین د نیمهپایلوبې تر بایللو وروسته د درېیم مقام په خپلولو سره خپله ماته جبران کړي. د انګلستان لوبغاړي د دې سیالۍ د ګټلو لپاره هیلهمن دي.
د فرانسې او انګلستان ملي لوبډلې به نن (د شنبې په ورځ) د امریکا د میامي په لوبغالي کې د درېیم مقام لپاره سره مخامخ شي.
دواړه دودیز سیالان وروستی ځل په قطر کې د ۲۰۲۲ کال نړیوال جام په منځلوبو (کوارټرپایلوبو) کې سره مخامخ وو، چې فرانسې هغه مهال انګلستان ته ۲–۱ ماتې ورکړې وه.
اوس فرانسه غواړي خپله برلاسي وساتي، او انګلستان غواړي د هغې ماتې غچ واخلي.
ځکه چې دواړه لوبډلې له پایلوبې پاتې شوې دي، تمه کېږي د درېیم مقام د لوبې په ګټلو سره د خپلو مینهوالو مایوسي یو څه کمه کړي.
د راپورونو له مخې، د دواړو لوبډلو روزونکي، دیدیه دیشام او توماس توخل، ښايي هغو لوبغاړو ته هم د لوبېدو فرصت ورکړي چې په روان نړیوال جام سیالیو کې د لوبېدو لږ چانس ورکړل شوی وو.
د فرانسې احتمالي لوبډله:
- مایک مانیان (ګولساتونکی)
- مالو ګوستو
- مکسنس لاکروا
- ابراهیما کوناته
- تیو هرناندېز
- وارن زایر-ایمري
- انګولو کانتې
- مایکل اولیسه
- راین چرکي
- دیزیره دووې
- کیلیان امباپې
د فرانسې دفاعي ستوری ویلیم سلیبا د هسپانیا پر وړاندې په نیمه پایلوبه کې د ټپي کېدو له امله له دې لوبې بهر دی.
د انګلستان احتمالي لوبډله:
- جورډن هینډرسن
- ټریوو چلوباه
- مارک ګویهي
- جان سټونز
- جېد سپېنس
- کوبي ماینو
- ایلیټ انډرسن
- مورګن راجرز
- نوني مادویکه
- هېري کېن
- مارکوس راشفورډ
په همدې حال کې، د درېیم مقام د لوبې د ټکټونو بیې هم راټیټې شوې دي.
د فرانسې او انګلستان د نیمه پایلوبو له ماتو وروسته، د دواړو لوبډلو د مینهوالو د لېوالتیا په کمېدو سره د ټکټونو د بیا پلور بازار کې بیې په چټکۍ راښکته شوې، او اوس د دې سیالۍ ځینې ټکټونه له ۱۰۰۰ امریکايي ډالرو څخه په ټیټه بیه هم موندل کېږي.