رهبري د هرې ټولنې، ادارې او کورنۍ د بریا او پرمختګ یو له مهمو بنسټونو څخه ده. د یوه رهبر شخصیت، فکر، لیدلوری او کړنې د هغه چاپېریال پر راتلونکې ژور اغېز لري چې مشري یې پر غاړه لري. همدا لامل دی چې د رهبرۍ موضوع تل د خلکو او ټولنو د پام وړ پاتې شوې ده. ښه رهبري نه یوازې د ستونزو د حل وسیله ده، بلکې د پرمختګ، یووالي او هوساینې لپاره هم لار هواروي.
ښه رهبر هغه څوک دی چې د مقام او واک پر ځای د خدمت احساس ولري. هغه د خلکو اړتیاوې درک کوي، د هغوی ستونزو ته غوږ نیسي او د حل لپاره یې اغېزمن ګامونه اخلي. ښه رهبر یوازې امر نه کوي، بلکې د خپلو کړنو له لارې د نورو لپاره بېلګه هم وي. د صداقت، عدالت، زغم او مسئولیت احساس هغه ځانګړنې دي چې د یوه بریالي رهبر شخصیت جوړوي.
د رهبرۍ ارزښت د کورنۍ له چاپېریال څخه پیل کېږي. په کورنۍ کې د مور او پلار ښه رهبري د اولادونو په روزنه او شخصیت جوړونه کې مهم رول لري. کله چې په کورنۍ کې سالمه رهبري موجوده وي، د متقابل درناوي، مینې او همکارۍ فضا رامنځته کېږي. همدغه سالمې کورنۍ بیا د یوې سالمې ټولنې بنسټ جوړوي.
په ادارو او سازمانونو کې هم د رهبرۍ اغېز خورا څرګند وي. هغه اداره چې د یوه باصلاحیته او لیرې لیدونکي رهبر تر مشرۍ لاندې فعالیت کوي، د پرمختګ او بریا چانسونه یې زیات وي. ښه رهبر خپلو کارکوونکو ته د کار زمینه برابروي، د هغوی وړتیاوې پیاوړې کوي او د نوښت لپاره یې هڅوي. په داسې ادارو کې خلک یوازې د معاش لپاره کار نه کوي، بلکې د ادارې د موخو او بریا لپاره هم ځان مسئول ګڼي.
په ملي کچه، د رهبرۍ اهمیت لا پسې زیاتېږي. د یوه هېواد پرمختګ، ثبات او سوکالي تر ډېره د رهبرۍ له کیفیت سره تړاو لري. هغه مشران چې د ولس ګټې له شخصي ګټو پورته ګڼي، د ملت باور ترلاسه کوي او د خلکو په زړونو کې ځانګړی ځای پیدا کوي. برعکس، کله چې رهبري له عدالت، صداقت او مسئولیت څخه لرې شي، د خلکو او نظام ترمنځ واټن زیاتېږي او د پرمختګ بهیر ته زیان رسوي.
ښه رهبر د ستونزو پر مهال نه وارخطا کېږي، بلکې د حل لارې لټوي. هغه د اختلافاتو پر ځای یووالي ته کار کوي او د ناامیدۍ پر ځای د امید پیغام ورکوي. د رهبرۍ اصلي ځواک په دې کې نه دی چې خلک تر واک لاندې وساتي، بلکې په دې کې دی چې د هغوی باور او ملاتړ ترلاسه کړي. کله چې خلک پر خپل رهبر باور ولري، نو له هغه سره اوږه په اوږه د ستونزو پر وړاندې درېږي او د پرمختګ په لور ګډ ګامونه اخلي.
تاریخ هم ښيي چې لوی بدلونونه او ستر پرمختګونه د اغېزمنو او باصلاحیته رهبرانو له برکته رامنځته شوي دي. هغه رهبران چې روښانه لیدلوری، قوي اراده او د خدمت روحیه لري، کولی شي ملتونه له ستونزو وباسي او د پرمختګ نوې لارې ورته پرانیزي. د داسې رهبرانو نومونه تل د خلکو په زړونو او د تاریخ په پاڼو کې په درناوي یادېږي.
رهبري یوازې یو مقام نه، بلکې یو ستر مسئولیت دی. رهبر باید د خلکو باور وساتي، عدالت تأمین کړي، د پرمختګ لپاره زمینه برابره کړي او د ټولنې د یووالي لپاره کار وکړي. کله چې دا ځانګړنې په یوه رهبر کې موجودې وي، نو ولس ترې نه تښتي، بلکې پرې ویاړي، ملاتړ یې کوي او د خپلې بریا او هوساینې هیله ورسره تړي.
ښه رهبري ټولنې ته جرأت، پر ځان باور او د روښانه راتلونکي هیله وربښي. هغه ملتونه چې د سالمې او اغېزمنې رهبرۍ له نعمت څخه برخمن وي، د پرمختګ، ثبات او سوکالۍ پر لور چټک ګامونه اخلي.
لیکوال: شاه زلمی