تاند (جمعه، د غبرګولي/ جوزا ۱۵ مه) د روسیې د صدراعظم مرستیال الکسي اوورچوک ویلي، سره له دې چې سیمه له امنیتي او سیاسي ننګونو سره مخامخ ده د افغانستان له لارې د رېللارې جوړولو پروژه، ، لا هم په جدي ډول تر بحث لاندې ده.
نوموړي د سن پترزبورګ نړیوال اقتصادي فورم پر مهال وویل چې په ځانګړي ډول د هرات له لارې لوېدیځ مسیر د سیمې د ترانزیت او اقتصادي همکاریو لپاره مهم بلل کېږي.
اوورچوک زیاته کړه چې دا طرحه یوازې د رېلګاډي پټلۍ نه ده، بلکې د پایپ لاینونو او ترانزیتي سړکونو په څېر نورې بنسټیزې پروژې هم پکې شاملې دي.
هغه ومنله چې په سیمه کې شخړې او امنیتي ستونزې د دغو پروژو د پرمختګ بهیر ورو کوي، خو ټینګار یې وکړ چې د ترانسپورتي او لوژستیکي لارو د پیاوړتیا لپاره هڅې روانې دي.
د سن پترزبورګ په نړیوال اقتصادي فورم کې د احمدالله وثیق په مشرۍ د طالبانو یو پلاوی هم ګډون لري.