تاند (چهارشنبه، د غبرګولي ۱۲ مه) اروپايي ټولنې اعلان کړی چې په افغانستان کې د وروستیو سېلونو له زیانمن شویو خلکو سره د مرستې لپاره یې ۵۰ زره یورو ځانګړې کړې دي.
په جنوبي اسیا کې د اروپايي ټولنې د بشري مرستو څانګې ویلي، دا مرسته به د طبیعي پېښو د بېړني غبرګون له بودجې څخه د افغاني سرې میاشتې ټولنې له لارې سېلاب ځپلو کورنیو ته ورسېږي.
د دې ادارې په وینا، وروستیو سېلونو ګڼې ټولنې اغېزمنې کړي او په افغانستان کې یې له مخکې موجود بشري وضعیت لا پسې خراب کړی دی.
اروپايي ټولنې تر دې وړاندې هم د روان میلادي کال د اپرېل په ۲۴مه له سېلځپلو افغانانو سره ۱۷۵ زره یورو مرسته کړې وه.
ایسلنډ د افغانستان بشري صندوق ته ۴۰۲ زره ډالر ورکړل
له بلې خوا، د ملګرو ملتونو د بشري چارو د همغږۍ دفتر (اوچا) ویلي چې ایسلنډ د افغانستان بشري صندوق ته ۵۰ میلیونه ایسلنډي کرونه، چې شاوخوا ۴۰۲ زره امریکايي ډالر کېږي، مرسته کړې ده.
اوچا د چهارشنبې په ورځ په یوه خبرپاڼه کې وویل، دا مالي مرسته به د هغو بشري بنسټونو له فعالیتونو ملاتړ وکړي چې په افغانستان کې له بېلابېلو بحرانونو اغېزمنو کورنیو ته بېړنۍ مرستې رسوي.
اوچا د ایسلنډ له دې مرستې مننه کړې او ویلي یې دي:
«ستاسې ملاتړ بشري شریکانو ته دا زمینه برابروي چې د افغانستان په بېلابېلو سیمو کې بحران ځپلو کورنیو ته بیړنۍ مرستې ورسوي.»
د بودجې له سخت کمښت سره هممهاله مرستې
دا مرستې په داسې حال کې اعلانېږي چې مرستندوی بنسټونه په افغانستان کې د بشري اړتیاوو د پوره کولو لپاره د بودجې د جدي کمښت په اړه خبرداری ورکوي.
اوچا مخکې ویلي و چې د ۲۰۲۶ کال لپاره د افغانستان د بشري مرستو د پلان د پلي کېدو لپاره ۱.۷۱ میلیارد ډالرو ته اړتیا ده، خو د مې میاشتې تر پایه یوازې شاوخوا ۱۶ سلنه اړینه بودجه برابره شوې ده.
بشري ادارې خبرداری ورکوي چې که د مرستو لپاره نورې مالي سرچینې برابرې نه شي، میلیونونه اړمن افغانان به له اړینو مرستو بې برخې پاتې شي.