تاند (شنبه، د غبرګولي/ جوزا ۹ مه) ایراني رسنیو د کسپین په غاړه د خپل هیواد د انزلي آزادې سیمې د ادارې مشر، مصطفی طاعتيمقدم، له قول راپور ورکړ چې له روسیې څخه د ۵ زره ټنه سونتوکو لومړۍ جوپه د کسپین سمندر له لارې د ایران انزلي بندر ته رسېدلې او ټاکل شوې د رېلګاډي په وسیله افغانستان ته ولېږدول شي.
نوموړي ویلي چې د دې ترانزیتي بهیر دوام به د انزلي آزادې سیمې اقتصادي ودې ته وده ورکړي.
د ایران د تسنیم خبري آژانس د راپور له مخې، طاعتيمقدم وویل چې د کسپین بندر د پراختیايي پروګرامونو په چوکاټ کې به ډېر ژر دا امکان برابر شي چې بارونه په مستقیم ډول له بېړیو څخه د رېلګاډي واګونونو ته ولېږدول شي. د هغه په وینا، دا اقدام به د قانوني اسانتیاوو او د انزلي آزادې سیمې له امتیازونو سره یو ځای د سونتوکو د ترانزیت لګښتونه راکم او د نړیوالو دهلېزونو په سیالۍ کې د ایران موقعیت پیاوړی کړي.
هغه زیاته کړه چې د دې رېللارې له بشپړه فعالېدو سره به د کسپین بندر له لارې د سونتوکو کلنی ترانزیت زیات شي، چې نه یوازې د انزلي آزادې سیمې اقتصادي پرمختګ ته ګټه رسوي، بلکې د سیمې د لوژستیکي مرکز په توګه به د ایران رول هم پیاوړی کړي.
د نوموړي په وینا، د دې ترانزیتي لارې پراختیا به له منځنۍ اسیا او یوروایشیا (اروپايي- اسیايي) هېوادونو سره سوداګري اسانه کړي او د سمندري او رېللارې ګډ ترانسپورټ به د نورو توکو، لکه د پتروشیمي محصولاتو او غلو دانو د لېږد لپاره هم زمینه برابره کړي.
طاعتيمقدم وویل چې د ګاومنډیو هیوادونو له رېللارو سره د دې لارې نښلول اقتصادي فعالانو ته د لا پراخو بازارونو د لاسرسي فرصتونه برابروي.
دا نوې لار له دې کبله هم مهمه ده چې د پاکستان پر لارو د افغان سوداګرو باور ختم شوی دی او دا لارې له څو میاشتو راهیسې عملاً بندې هم دي.