تاند (شنبه د غبرګولي/ جوزا 9مه) لغمان ولایت کې د ترافیکي پېښې له امله ۱۸ تنه مړه شوي دی.
لغمان کې د طالبانو د ولایت ویاند عبدالمالک نیازي تاند وېب پاڼې وویل چې، دغه پېښه نن سهار شاوخوا ۵:۳۰ بجې د کابل ـ جلالآباد پر عمومي لویه لاره، د لغمان ولایت اړوند د سرخکانو چوک ته څېرمه پېښه شوې ده.
نیازی زیاتوي چې، په دې پېښه کې د کډوالو یو لارۍ ډوله موټر چپه شوی چې، له امله یې ۱۸ تنه مړه شوي او ۲۹ تنه زخمیان دي.
نوموړي ویلي، د مړو شویو کسانو په منځ کې ۱۰ ماشومان، ۵ ښځې او ۳ نارینه شامل دي.
نیازي زیاته کړې، د پېښې له رامنځته کېدو سره سم د طالبانو د ترافیکو مسؤلان او د مهاجرینو کمېټې مسؤلان سیمې ته رسېدلي او د ژغورنې هڅې پیل کړې.
سرچینه زیاتوي چې، ټپیان د لا ښې درملنې لپاره د ننګرهار ولایت روغتیايي مرکزونو ته لېږدول شوي دي.