تاند (جمعه، د غبرګولي/ جوزا ۸ مه) ډیپلوماتیکې سرچینې وايي چې د واشنګټن او تهران ترمنځ احتمالي هوکړه به په دوو پړاوونو کې عملي شي.
د دغو سرچینو پر اساس، لومړی پړاو به د تفاهملیک لاسلیک وي، او پاکستان به هم د شاهد په توګه د لاسلیک په مراسمو کې ګډون ولري.
له دې مخکې، «اکسیوس» وېبپاڼې له موضوع د خبرو چارواکو له قوله راپور ورکړی و چې امریکا او ایران یوې هوکړې ته رسېدلي، خو دا توافق لا هم د امریکا د ولسمشر ډونالډ ټرمپ وروستي تایید ته اړتیا لري.
د دغو سرچینو په وینا، په دې توافق کې ټاکل شوې چې د راتلونکو ۶۰ ورځو مذاکراتو اصلي تمرکز به پر اتومي دوسیې وي. همداراز، د هوکړې د عملي کېدو پر مهال به پر ایران لګېدلی سمندري بندیز هم لرې شي.
یوه امریکايي چارواکي اکسیوس ته ویلي، په دې توافق کې ایران ژمنه کړې چې د اتومي وسلو د ترلاسه کولو هڅه به نه کوي، او همداراز به د ۳۰ ورځو په موده کې هرمز تنګی له ټولو ماینونو پاکوي.
هغه زیاته کړې چې ټرمپ منځګړو ته ویلي، د هوکړې د جزییاتو د ارزونې لپاره څو ورځو وخت ته اړتیا لري.
اکسیوس همداراز راپور ورکړی چې د دې هوکړې شرایط د سېشنبې په ورځ وروستي شوي، خو د دواړو هېوادونو مشرانو تر اوسه دا شرایط نهايي کړي نه دي.
د یادونې وړ ده چې امریکا او اسرائیل د فبرورۍ په ۲۸مه پر ایران پوځي فشارونه زیات کړي وو، چې له هغې وروسته د سیمې وضعیت لا پسې ترینګلی شوی دی.