تاند (یکشنبه د وري – حمل ۳۰مه) افغانستان کې د طالبانو حکومت په کندهار ولایت کې د دوی له بیرغ پرته د نورو بیرغونو پر چاپ بندیز ولګوه.
په یاد ولایت کې د طالبانو د اطلاعاتو او کلتور ریاست زیاته کړې چې، کتابتونونو، چاپي او د ډیزاین مرکزونو او پلورنځیو ته یې خبرداری ورکړی چې په کندهار ښار او ولسوالیو کې د طالبانو د حکومت له رسمي بیرغ پرته د نورو بیرغونو چاپ، خپرول او پېر او پلور جواز نه لري.
دغه ریاست کندهار کې له کتابتونونو، چاپي او د ډیزاین مرکزونو او له پلورنځیو غوښتي چې د نورو بیرغونو له کارونې ډډه وکړي.
دا بندیز په داسې مهال لګول کېږي چې، ډېری فعالان پر طالبانو له دې امله نیوکه کوي چې، دوی یوازې د خپلې ډلې خبرې مني او نور ولس ورته هېڅ ارزښت نه لري.
عام خلک هم غوښتنه کوي چې، ملي بیرغ ته دې سپکاوی نه کېږي.
طالبان اوس په ولایتونو کې ځوانان نه پرېږدي چې ملي بیرغ پر ټټر ولګوي او یا یې په نورو مسایلو کې ترې ګټه واخلي.
دوی هڅه کوي یوازې د دوی سپین بیرغ په هرځای کې ولګول شي هغه څه چې ټول ولس یې اندېښمن کړی دی.