تاند ( سه شنبه د وري – حمل ۲۵مه) اسوشیټېډپرېس خبري اژانس په یوه راپور کې ویلي چې پاکستان د امریکا او ایران ترمنځ د خبرو دوهم پړاو د کوربتوب وړاندیز کړی دی.
پاکستان ویلي چې، دا پړاو خبرې دې په پلازمېنه اسلاماباد کې ترسره شي. د راپور له مخې، دا خبرې به په راتلونکو ورځو کې، د اوربند له پای ته رسېدو مخکې ترسره شي.
اسوشیټېډپرېس خبري اژانس د پاکستاني چارواکو له قوله چې د نوم نه ښودلو په شرط یې خبرې کړې ویلي چې، دا وړاندیز به د دواړو لورو په غوښتنې پورې تړلی وي.
سرچینې ویلي که هغوی بل ځای غوره کړي، نو ممکن د خبرو ځای بدل شي.
د راپور له مخې، پاکستان هڅه کوي چې د منځګړتوب له لارې د دواړو هېوادونو ترمنځ د خبرو بهیر ته اسانتیا برابره کړي، څو سیمهییز ثبات پیاوړی شي.
په همدې حال کې الجزیرې او اعربیې چاینلونو هم ویلي چې ممکن ایران او امریکا د پنجشنبې په ورځ بل پړاو خبرې پیل کړي.
تر دې وړاندې د لومړي پړاو خبرو کوربه هم پاکستان وو خو هغه پړاو بې پایلې پای ته ورسېده.