تاند (جمعه، د وري/ حمل ۲۱ مه) نامعلومو وسلوالو کسانو د هرات ولایت په انجیل ولسوالۍ کې پر یو شمېر ملکي وګړو ډزې کړې دي.
د سرچینو په وینا، دا پېښه نن جمعه (۲۱ حمل) په دهمیري کلي کې د هاشمي پله ته نژدې شوې ده.
دا سیمه د تفریح ځای په توګه پېژندل کېږي او عموماً خلک په تېره بیا شیعه ګان د چکر لپاره ورځي.
سرچینو زیاته کړې چې ډزې د خلکو پر یوې غونډې شوې دي او د مرګژوبلې شمېر لسګونه کسان بلل شوي.
خو تر اوسه د وژل شویو او ټپیانو کره شمېر معلوم نه دی.
د هرات د مرکزي روغتون ډاکترانو ویلي چې تر لسو ډېر مړي وروړل شوي دي خو د پېښې شاهدان وايي چې ممکن د مړینو شمېر تر دې ډېر وي.
د طالبانو سیمهییزو مسوولانو تر اوسه په دې اړه څه نه دي ویلي.