تاند (شنبه، د کب/ حوت ۱۶ مه) پر ایران د امریکا او اسراییل د بریدونو له کبله په پاکستان کې د تېلو د وارداتو د کموالي له کبله نه یوازې د تېلو پر ټانکونو بیروبار زښت زیات شوی، بلکې د پټرولو او ډیزلو بیې لوړې شوې دي.
پاکستاني رسنیو نن راپور ورکړ چې د تېلو د بیې له لوړېدو وروسته، د هېواد په بېلابېلو ښارونو کې ترانسپورټرانو د سفر کرایې په خپل سر لوړې کړې دي.
د راپورونو له مخې، له لاهور څخه کراچۍ ته د سفر کرایه له ۵۰۰ څخه ۷۵۰۰ روپیو ته رسېدلې ده. همداراز له فیصلآباد څخه اسلاماباد ته د سفر کرایه ۳۰۰ روپۍ زیاته شوې او په لاهور ښار کې دننه د ترانسپورټ کرایه هم ۱۵۰ روپۍ لوړه شوې ده.
په ملتان کې ترانسپورټرانو د کرایې کچه نژدې ۴۰ سلنه لوړه کړې، او په کراچۍ کې د میني بس کرایه تر ۲۰ روپیو پورې زیاته شوې ده.
ټترانسپورټران وایي چې د ډیزلو د بیو د زیاتوالي له امله د دوی لګښتونه ډېر شوي او دوی نه شي کولای چې ډیزل له خپل جېب څخه واخلي.
بل لور ته، ښاریانو اندېښنه څرګنده کړې چې د کرایو له زیاتېدو سره به له یوه ښار څخه بل ښار ته سفر ستونزمن شي او د اختر په مناسبت به خلکو ته خپلو کورونو ته رسېدل هم سخت شي.