تاند ( دوشنبه د مرغومي – جدي ۱۵مه) د طالبانو د عامه امنیت پولیسو د رسنیو دفتر په یوه خبرپآڼه کې ویلي چې، د عامه امنیت پولیسو، د ترافیکو ریاست سره په همکارۍ، په تېره اونۍ د کابل ښار په دروازو او د ښار په چکپواینټونو کې ۱۳۱۰ ملکي او نظامي موټرې درولي دي.
په خبرپاڼه کې راغلي، چې په دې موټرو کې بې اسناده موټرونه او د رنګه ښیښو لرونکي موټرې شامل دي.
د خبرپاڼې پر بنسټ، د ټولو درول شوو موټرو څخه ۱۲۷ موټرونه د کابل ښار په مختلفو پوستو کې ښاري پولیسو ته لیږدول شوي دي.
دغه راز د ولایتي موټرو په ګډون ۱،۱۸۳ موټرې کابل ښار ته د ننوتلو اجازه نه ده ورکړل شوې او بېرته خپلو ولایتونو ته لېږدول شوي دي.
په ورته وخت د طالبانو د کورنیو چارو وزارت د عامه امنیت پولیسو مشر ملا عبدالرحیم ظهیر د قانون پلي کولو کې د دغو اقداماتو هرکلی کړی او له خلکو یې غوښتي چې خپل وساېط له قانون سره سم برابر کړي.
د هغه په وینا، د قانون خلاف هر ډول عمل جرم ګڼل کیږي او له سرغړونکو سره به قانوني چلند وشي.