تاند (چهارشنبه، د چنګاښ/ سرطان ۳۱ مه) له سختو اقتصادي ستونزو سره مخامخ پاکستان، د امریکا او ایران ترمنځ په وروستیو خبرو اترو او ډیپلوماټیکو هڅو کې د خپل رول له ادعا وروسته، له امریکا د ۱۰ میلیارد ډالره مالي ملاتړ غوښتنه کړې ده.
د بریتانیايي رسنیو د راپور له مخې، اسلاماباد د امریکا د خزانې وزیر، سکاټ بېسنټ، ته وړاندیز کړی چې د پنځو کلونو لپاره دې پاکستان ته ۱۰ میلیارده ډالره د اسعارو د ثبات ځانګړې مالي اسانتیا (Exchange Stabilization Support Facility) ورکړي.
راپور وايي، دا غوښتنه په داسې وخت کې شوې چې پاکستان ادعا کوي د امریکا او ایران ترمنځ یې د خبرو اترو او ډیپلوماټیکو اړیکو په اسانه کولو کې مهم رول لوبولی، او همدې کار یې د واشنګټن په نظر کې خپل ارزښت زیات کړی دی.
که امریکا دا مالي غوښتنه ومني، نو پاکستان به وکولای شي خپلې د بهرنیو اسعارو زېرمې پیاوړې کړي، د روپۍ پر ارزښت فشار کم کړي او پر نړیوال وجهي صندوق (IMF) او نورو بیړنیو مالي سرچینو خپله تکیه راکمه کړي.
پاکستان دا مهال د پیسو د نړیوالې صندوق د اووه میلیارده ډالرو پور د پروګرام پر اساس سخت اقتصادي اصلاحات عملي کوي، چې پکې د مالیاتو لوړول، د دولتي لګښتونو کمول او مالي انضباط شامل دي.
اقتصادپوهان وايي، که څه هم پاکستان په ۲۰۲۳ کال کې د پیسو د نړیوال صندوق د درې میلیارده ډالرو بیړني پور په مرسته له اقتصادي سقوط وژغورل شو، خو د دغه هېواد اقتصاد لا هم د بهرنیو پورونو، د دوستو هېوادونو د مالي مرستو او د پورونو د نوي کولو پر دوام ولاړ دی.