تاند (دوشنبه، د وري/ حمل ۳۱ مه) رویټرز خبري اژانس د پاکستان د یوې امنیتي سرچینې له قوله راپور ورکړی چې د پاکستان د پوځ قومندان عاصم منیر له ډونالډ ټرمپ سره خبرې کړې او هغه ته یې ویلي چې د ایران سمندري محاصره له تهران سره د سولې د خبرو خنډ شوې ده.
د پاکستاني چارواکو څرګندونې عموماً د امریکا له لوري دیکته شوې خبرې ګڼل کېږي.
د سرچینې په وینا، ټرمپ په ځواب کې ویلي چې «دا سپارښتنه به په پام کې ونیسي».
دا راپور تر اوسه د امریکايي چارواکو له خوا نه دی تایید شوی او نه هم رد شوی.
بل لور ته، د ایران چارواکو د امریکا له خوا سمندري محاصره «د اوربند سرغړونه» بللې او ویلي یې دي چې تر اوسه د پاکستان په کوربهتوب له امریکا سره په دوهم پړاو خبرو کې د ګډون کوم پلان نه لري.
امریکا پرون ویلي و چې د دوشنبې په ورځ (یعني نن) به یې مرکچي پلاوی پاکستان ته ورسېږي او د ایران په وخت به د سې شنبې په ورځ له ایراني لوري سره خبرې پیل کړي.