تاند(دوشنبه، د وري/ حمل ۳۱ مه) پاکستاني رسنیو نن (دوشنبې) راپور ورکړ چې د دغه هیواد د اوسني حکومت په لومړیو دوو کلونو کې د فدرالي پورونو کچه په بېساري ډول لوړه شوې ده.
د راپورونو له مخې، حکومت په دې موده کې شاوخوا ۱۵ زره او ۷۲ میلیارد روپۍ پور اخیستی، چې دا د هېواد په تاریخ کې یو ریکارډ بلل کېږي.
د پاکستان د مرکزي بانک (سټېټ بنک) د تازه معلوماتو له مخې، دا زیاتوالی د ۲۰۲۴ کال له مارچ څخه د ۲۰۲۶ کال تر فبرورۍ پورې راغلی دی.
شمېرې ښيي چې په دې موده کې هره ورځ په اوسط ډول نژدې ۲۱ میلیارد روپۍ پور زیات شوی دی.
د مرکزي بانک د جزییاتو له مخې، په دې دوو کلونو کې د کورنیو پورونو اندازه ۱۴ زره او ۴ میلیارد روپۍ زیاته شوې، او بهرني پورونه هم شاوخوا یوزرو ۶۸ میلیارد روپۍ لوړ شوي دي.
له دې سره، تمه ده چې د پاکستان د فدرالي حکومت ټول پور د ۲۰۲۶ کال تر فبرورۍ پورې نژدې ۷۹ زره او ۸۸۲ میلیارد روپیو ته ورسېږي.
د یادونې وړ ده چې د لنډمهالې (سرپرست) حکومت تر وروستیو میاشتو، یعنې د ۲۰۲۴ کال تر فبرورۍ پورې، د پورونو کچه شاوخوا ۶۴ زره او ۸۱۰ میلیارد روپۍ وه، چې اوس په څرګند ډول لوړه شوې ده.
اقتصادي متخصصان خبرداری ورکوي چې د پورونو دا چټک زیاتوالی د پاکستان پر اقتصاد جدي اغېزې کولی شي، او په دې اړه اندېښنې زیاتې شوې دي.