تاند ( پنجشنبه، د کب/ حوت ۲۱ مه) د اروپايي کمیسیون مشرې ویلي چې د امریکا او اسراییل له خوا د ایران پر ضد د جګړې له پیل راهیسې، چې اوس یې ۱۳ ورځې تېرې شوې دي، د اروپايي مصرفوونکو پر اوږو شاوخوا درې میلیارده یورو اضافي لګښت تپل شوی دی.
اورزلا فوندیرلاین د چهارشنبې په ورځ، د فبرورۍ په ۲۰مه، د فرانسې په ستراسبورګ ښار اروپايي پارلمان ته وویل:
«د دې جګړې له پیل راهیسې د ګاز بیه ۵۰ سلنه او د تېلو بیه ۲۷ سلنه لوړه شوې ده.»
هغې زیاته کړه:
«که دا په یورو حساب کړو، یوازې د جګړې په لسو ورځو کې د فوسیلي سون توکو د وارداتو لپاره پر اروپايي مالیه ورکوونکو درې میلیارده یورو (۳.۵ میلیارده ډالر) اضافي لګښت راغلی دی.»
فوندیرلاین وویل چې اروپايي کمیسیون د انرژۍ د بیلونو د لګښت د کمولو لپاره نور اقدامات هم ارزوي، چې پکې د ګاز د بیې لپاره د حد ټاکل هم شامل دي.
په ۲۰۲۲ کال کې پر اوکراین د روسیې له پراخ یرغل وروسته د انرژۍ بیې په اروپايي ټولنه کې سختې لوړې شوې وې. اوس له ایران سره د جګړې له امله، دا په څو وروستیو کلونو کې دوهم ځل دی چې د نړیوالو شخړو له امله په اروپا کې د انرژۍ بیې په چټک ډول لوړېږي.
د اروپايي کمیسیون مشرې ټینګار وکړ چې د فوسیلي سون توکو د عرضه کوونکو د متنوع کولو لپاره وروستیو هڅو تر یوه حده د منځني ختیځ د جګړې اغېزې کمې کړې دي.
خو هغې وویل:
«دا په دې معنا نه ده چې موږ د بیو د ناڅاپي لوړېدو پر وړاندې خوندي یو. د انرژۍ بازارونه نړیوال دي.»
هغې زیاته کړه:
«هر څه چې وکړو، تر هغه چې د فوسیلي سون توکو یوه مهمه برخه له بېثباته سیمو څخه واردوو، موږ به لا هم زیانمن او پر نورو متکي پاتې شو.»