تاند (پنج شنبه د کب – حوت ۲۱مه) د امریکا د بهرنیو چارو وزارت په پېښور کې خپله کونسلګري د تل لپاره تړي.
اسوشېټېډ پرېس خبري اژانس په خپل راپور کې ویلي چې، دا د امریکا هغه ډيپلوماټيک ماموریت و، چې ډیورنډ کرښې ته نږدې او پر افغانستان د ۲۰۰۱کال تر برید مخکې د جګړې پرمهال او تر هغې وروسته د لوژستیک مهم مرکز ګڼل کېده.
د سرچینې په راپور کې ویل شوي چې، د امریکا بهرنیو چارو وزارت دغه پرېکړه څو ورځې وړاندې کانګرس ته استولې.
یاد وزارت ویلي چې، د دې پرېکړې له عملي کېدا سره ۷.۵ مېلیونه ډالره سپمولی شي.
دغه وزارت په استولي لیک کې زیاته کړې چې، د یادې څانګې په تړل کېدو سره به په پاکستان کې د امریکا ګټې زیانمنې نهشي.
دغه پرېکړه له تېر یو کال راهیسې له هغه وروسته تر غور لاندې ده، چې د ټرمپ حکومت د خپلو لګښتونو کمولو پرېکړه وکړه.
د رویټرز خبري اژانس په راپور کې ویل شوي، چې دغه پرېکړه د ایران د جګړې سره تړاو نهلري او نه هم په پاکستان کې د امریکا پر ډیپلوماټیکو مرکزونو د لاریونونو له کبله ده.
د مالوماتو له مخې تېرکال کې د امریکا د لګښتونو کمولو د پلان په لړکې د دغه وزارت څو زره کارکوونکي له دندو ګوښه شول او د امریکا د نړیوالې پراختیایي ادارې نږدې ټول کارکوونکي له دندو ګوښه او دغه اداره په بشپړه توګه منحل شوه.
په پېښور کې د امریکا د کونسلګرۍ تړل د دغه هېواد لومړنی بهرنی ډيپلوماټیک ماموریت دی، چې په بشپړه توګه بندیږي.
په راپور کې ویل شوي، چې په پېښور کې د امریکا کونسلګري ۱۸ امریکايي ډيپلوماټان او ۸۹ ځايي کارکوونکي لري او د یادې کونسلګرۍ په تړلو به شاوخوا ۳ مېلیونه ډالر لګښت راشي.
د رویټرز خبري اژانس د راپور پر اساس د دغه پېسو تر نیمايي ډېر ۱.۸ مېلیونه ډالر به د هغه زغرهواله کانټینري دفترونو پر لېږد ولګول شي، چې دوی د لنډمهاله اوسېدو لپاره کارول او پاتې پیسې به د ګاډو، برېښنايي او مخابراتي تجهیزاتو او د دفتر د فرنیچر پر لېږد مصرف شي.
د مالوماتو له مخې دغه ټول وسایل به په اسلاماباد کې د امریکا سفارت، کراچۍ، لاهور او نورو څانګو ته ولېږدوي.