تاند (چهارشنبه، د چنګاښ/ سرطان ۳۱ مه) ملګرو ملتونو راپور ورکړی چې د موریتانیا د سواحلو ترڅنګ د کډوالو د کښتیو د څو پېښو له امله لږ تر لږه ۱۴۴ کډوال او پناه غوښتونکي مړه یا ورک شوي دي. دا پېښه له لوېدیځې افریقا څخه د اروپا د کنري ټاپوګانو پر لور د اتلانتیک سمندر له خونړیو او خطرناکو ناورینونو څخه بلل کېږي.
د ملګرو ملتونو د کډوالو لویې کمېشنرۍ (UNHCR) ویلي چې د جولای له ۱۴مې تر ۱۸مې پورې د موریتانیا د نوادیبو له بندري ښار څخه د ژغورنې درې هڅې وشوې، چې په پایله کې یې د بېلابېلو هېوادونو ۳۸۷ کډوال او پناه غوښتونکي په خوندي توګه ساحل ته راوستل شول.
تر ټولو خونړۍ پېښه د هغې کښتۍ وه چې د ګامبیا له بوفولوتو سیمې څخه د هسپانیا د کنري ټاپوګانو پر لور روانه شوې وه. د دې سفر واټن شاوخوا ۹۰۵ سمندري میله (۱٬۶۷۷ کیلومتره) دی.
دا بېړۍ له ۲۵ ورځو راهیسې په سمندر کې سرګردانه وه او بالاخره د شنبې په ورځ وموندل شوه، خو له ټولو سپرو کسانو څخه یوازې ۳۸ تنه ژوندي ژغورل شوي دي.
د کډوالو لویې کمېشنرۍ د معلوماتو له مخې، په همدې کښتۍ کې ۱۴۳ نور کسان مړه یا ورک شوي دي.